PEMARGIN Pariwisata ring Kabupaten Gianyar kebaosang durung memargi becik. Nike mawinan rerincik pengembangan pariwisata durung pateh sekadi kabupaten sane siosan. Yening manut daging Perda RTRW, genah sane khusus preside ngembangang pariwisata, punike taler genah sane medue potensi pariwisata nenten mresidayang ngelimbakang potensi ekonomi.
“Perda RTRW tetujone becik pisan, nanging genah sane meduwe potensi pariwisata sekadi wisata alam durung praside kakembangang, niki mawinan ekonomi nenten preside memargi sekadi sane keaptiang krama desane,” baos Dewa Gede Agung Pastika, sinalih tunggil Yowana ring Desa Pejeng, Rabu (24/4).
Dewa Gede Agung meneng ring Desa Pejeng. Desan ipun meduwe potensi wisata alam sane asri tur ngulangunin pisan. Nanging Dewa Agung maosang, potensi pariwisata ring Pejeng durung prasida kakembangan lan kebecikang dados genah wisata. Meweh pisan genah ring Tampak Siring kakembangan dados genah wisata sane meduwe akomodasi pariwisata. Sane wenten wantah genah ngajeng lan Art Shop. Punike taler, desa sane siosan sampun sayage jagi dados desa wisata.
Nyingakin kewentenan lan pikobet punike, Dewa Agung nunas sareng Murdaning Jagat Bali, Gubernur Wayan Koster mangdane Perda RTRW punike nenten mikobetin pengembangan pariwisata. Ijin pengembangan akomodasi pariwisatane sane medasar antuk wisata alam pedesaan mangde nenten kelet pisan.
“Sekadi baos titiang ring arep, pariwisata ring Tampaksiring mangde praside kakembangan, napi malih Tampaksiring sampun katah kauningin meduwe genah sane asri pisan. Niki potensi becik anggen wisata alam. Aturan pengembangan pariwisatane sampunang kelet pisan, mangde krama Tampaksiring, meduwe pemargi jagi ngembangan genah pariwisatane,” punike Dewa Agung ngelanturang.
Dewa Agung Pastika ngenikayang meduwe usaha akomodasi pariwisata. Nanging durung prasida kakembangan ring Tampaksiring santukan kekeletin antuk aturan sane munggah ring Perda RTRW. Ragane meduwe rerincik jagi ngajak truna-truni milenial mangde sareng ngerereh pangupa jiwa ring pariwisata, mangde nenten keambil krama saking dura desa lan dura Negara.
“Niki pastika kedasarin antuk pengembangan Sumber Daya Manusia ring bidang pariwisatane. Selanturnyane, majeng ring krama utawi wargi sane meduwe genah becik anggen pariwisata, mangde nyarengin ngarya akomodasi pariwisata. Niki pengaptin titian sane mabuat pisan, dumogi semeton titiang ring Bali, naler Gianyar prasida sareng ngembangan pariwisata duwene. Punike taler pemerintah mangde nenten surud-surud mecikang pariwisata ring Bali utawi ring Gianyar,” Dewa Agung muputang baos. (sar)
Save as PDF